Roegfungh Daengh Lungzgim Baenzndei
@
Gyanghwnz gag ninz moeg baihlaj,
Miz sim siengj ndiep yah hix nanz;
Lumj duzroeg iek youq gwnz ranz;
Caenh naemj gip haeuxsan roengz dungx.
@
Lumj duzroeg iek youq gwnz ranz,
Caenh naemj gip haeuxsan roengz dungx;
Haeujsim cam mwngz gvai dahnuengx;
Haq mbauqngaenz Daegcuengh ndaej lwi？
@
Haeujsim cam mwngz gvai dahnuengx,
Haq mbauqngaenz Daegcuengh ndaej lwi？
Aen raeuz ndaej doengzban caen ndei;
Lumjdoengz gwn dangzrwi baenzmeih.
@
Aen raeuz ndaej doengzban caen ndei,
Lumjdoengz gwn dangzrwi baenzmeih;
Ngoenznaengz caez bae guh naz reih;
Haethaemh song ok ngeih haeujma.
@
Ngoenznaengz caez bae guh naz reih,
Haethaemh song ok ngeih haeujmaz;
Gvanbaz doxbaengh caemh suengda;
Doengz gaemfwngz ra gwn gvaq ciuh.
@
Gvanbaz doxbaengh caemh suengda,
Doengz gaemfwngz ra gwn gvaq ciuh;
Ndat yaem song aen sim doxciuq;
Rumz fwn seiq din'giuj caez ndwn.
@
Ndat yaem song aen sim doxciuq.
Rumz fwn seiq din'giuj caez ndwn;
Gvanbaz gangj ngaemqngaemq gvaq hwnz;
Gen demh gen ninz hix raen raeuj.
@
Gvanbaz gangj ngaemqngaemq gvaq hwnz,
Gen demh gen ninz hix raen raeuj;
Aen raeuz song vunz ndei daengz gyaeuj;
Caezgya caenh lumj ngaeux lienz sei.
@
Aen raeuz song vunz ndei daengz gyaeuj,
Caezgya caenh lumj ngaeux lienz sei;
Cietheiq gvaqcieng dou guh ceiz;
Mwngz bang dwk feiz gou daeuj bek.
@
Cietheiq gvaqcieng dou guh ceiz,
Mwngz bang dwk feiz gou daeuj bek;
Doxgyaez doengzmaij lumj daihhek;
Baenzseiq cungj mbouj het saek coenz.
@
Doxgyaez doengzmaij lumj daihhek,
Baenzseiq cungj mbouj het saek coenz;
Henz doxbyek bae gyawz saek ngoenz;
Boux mbiengj hix moengzmoengz baenzmuengh.
@
Henz doxbyek bae gyawz saek ngoenz,
Boux mbiengj hix moengzmoengz baenzmuengh;
Langh nuengxlwenz mwngz haq Daegcuengh;
Roegfungh daengh lungzgim baenzndei.
@
@….............
@.................
@.................
Bouxraiz：Daegcuengh
2013. 11. 09