----- Swnj baihgwnz
（2）
Cuengqhag le, Ojociengzciengz daiq duzma bae henz dah laj dinbya ciengx hanq. Aen moh daxbuz decouh youq gizneix. Daxbuz gaenq dai ndaej geij bi lo, Ojo cij mumjgyumq geiqndaej daxbuz dwg vunzngoemx, gig unqswnh. Ojo lijiq seiz, ciengzciengz bae henzdah ep bya dajcaemx. Daxbuz cawj caeuz ndei le, couh ok rog dou daeuj swenj：“Oj——o！”. Ojo baez dingqnyi, couh ganjvaiq buet ma. Aen mingzcoh de daihgaiqcouh dwg daj neix daeuj lo.
Dingq bouxlauxgangj, daxbuz dwg vunz Guengjdoeng, ngamq ndaej cibhaj bi couh deng canghgvaijvunzgai daeuj gizneix. Daxbuz haemq saundei, hojsik dwg vunzngoemx, daxgoeng Ojosam cib bi lij ndang dog, song loz haeuxgok couh cawx de daeuj guh yah.Daxgoeng dai caeux, daxbuz sam cib haj bi couh guhmaiq lo.
Ojo caengz rim bi,miz ngoenz ndeu, daxbuz bae haw cawx gyu, dauqma seiz miz duz malwg he riengzdaeuj, haeuj ranz raen Ojo ruenz gwnz namh, duzma couh gvaqbae mupmup rizriz,heuh nyinyi nyingqnyingq, naengh henz ndang mbouj liz, baenzlawz laeh cungjmbouj deuz. Duzma neix daj gyawz daeuj ni? Byawz cungj raen geizheih. Daxmeh guhmuengzbae cam gimq, mehgimq da laepsaez, cang sing goengcoj gangj：“Ai, mingh lan mbouj baenz mingh, mbwndingh daeuj doxcaeuq, ciengx ma haet haemh raeuq, doxcaeuq gvaq ndwenngoenz …..”.
Gvaq bi lai, duzmamaj ndaej youh hung youh sang, ca mbouj lai lumj duz cwzlwg nei.
Ranz Ojo dep gaenhlaj bya, laeng ranz miz goreiz hunghung ndeu, raemh bae geij ranz vunz. Duzmacungj haengj bae laj goek goreiz gvaqhaemh, haetromh hwnqdaeuj, diuq hwnj gwnzrinbanj bae ietnonx rauqrumz, yienghsiengq haemq lumj duzguk, miz di dwglau,hoeng mbouj luenh haeb vunz, hix mbouj luenh caeuq ma wnq doxceng doxhaeb.Daxboh naeuz de “siengq duzguk, sim duzyiengz”, doeklaeng couh heuh de guh“gukceij” lo.
Daengz Ojo ndaejcaeuq gukceij doeng buet sae lah seiz, daxbuz gaenq betcib geij bi lo. Daxbuzbyoem hau veuj vauq, rwz nuk da mong, ciengzseiz boux dog naengh laj roq dakndit, song fwngz cuengq gwnz gyaeujhoq, baenz ngoenz mbouj doengh mbouj ning.Vunzlai nyaengqfoedfoed byaij gvaq baihnaj daxbuz, cungj mbouj haengj dongx desaek coenz, cij miz gukceij seiz mbouj seiz bae rizriz fajfwngz reuq de.Seizcou, mbawfaex roz naiqniekniek daj gwnz bya mbin roengzdaeuj, doek rimdingj ranz, hix mbin daengz henz ndang daxbuz. Mbouj geij nanz, daxbuz binghnaek, daj song sam baez cim, bouxboux cungj naeuz mbouj yungh rap raemx dwkbyaekceh lo, caiq hix mbouj bae cingh canghyw. Ndaw ranz hojndoq, mboujndaejcawx saek liengx noh hawj daxbuz gwn. Doengceiq haemh haenx, fwn doek sese,mbwn gig nit, gukceij daj rog dauqma, daengx ndang gyuek boengz, bak gamz duzroeggae ndeu, dawz bae cuengq daengz henz mbonq daxbuz. Doeklaeng, daxbuz ndaejgwn geij gaemz dang nohroeg le, song caek raemxda rih gwnz naj, youh aj baklumj gangj gijmaz ……
Ndaw moh daxbuzhaem miz cit goj raezraez he.
----- Lij miz, deq swnj!

----- Swnj baihgwnz
(3)
Daengngoenz yaekdoek bya lo, fwjhaemh ingj ndaej bien mbwn hoengzgvanggvang, aen moh daxbuzronghsagsag. Geij duzhanq youq laj loh dinghdingh gwn nywj, Ojo naengh henz mohdaxbuz yawj saw, song reh mug rih roengzdaeuj raezrangh. Gukceij gag raen mbwq,buet bae gyae caeuq geij duz ma’meh guh’angq.
Ojo cuengq cek sawroengzdaeuj, yawj raen daduicangj Laujliengz fizfadfad byaij gvaq bien dah, cikhaiz ndeu gaenq mbouj rox doek youq gizlawz lo. Daduicangj hajcib geij bi, byoemgyaeujbuenq hau, banh saeh goengdauh, hoeng hix ngah laeuj, ak gangj vahhaeu, ak ndaqvunz. Daegbied dwg gwn laeuj fiz le, aj bak couh raix vah mbouj daenj vaq haenx,hawj vunz dingq le naj hoengz sim diuq. Daduicangj cingq damzbyoedbyoed byaij daeuj,ngangx naj baez raen Ojo couh ndaq：“Gumq reuq meh mwngz Ojo, bang hanq mwngz caen biz ha! Gaej hawjroengz naz bae gwn haeux bw!” Duz hanqboux ndeu iet hoz raezrangh yaek cung daeujdot de. Daduicangj sikhaek aj ga capmax hat naeuz：“Daeuj vei, hanq raq! Daeuj dot raem vei!”.Mboujliuh ngamq gangjsat, cihgeij couh gag ndang baix daenghnaengh gwnz namh, dingjlingz naengh denggong haexvaiz ndeu. Geij duzhanq gongjgongj gadgad ngangx gyaeuj caez hemqbemx. Ojo moenghmangh ndwn youq gwnz loh, song reh mug raengh hwnj raenghroengz.
Daduicangj miz daeglwggyaeujbej ndeu heuh guh Liengz Yinghyungz, caeuq Ojo caemhban doegsaw. Maeglumj mij, gvij lumj gvaiq, Liengz Yinghyungz caeuq daxboh de ityiengh ak gangjvahhaeu, doxdaj doxndaq ceiq mizmingz, youh iu baenz fangz, ciengzseiz youqndaw gyauqsiz oknyouh.
Ranz LiengzYinghyungz ciengx miz song duz madaeg henj, vunz heuh “magouh”. Doiq ma neixmbouj suenq hung, seiq da, rwz daengj, raen duz maz cungj siengj haeb. Codaeuzdaduicangj laihnaeuz “magouh” lingzleih, banhaemh daiq bae dwknyaen, mboujliuh ngamqhaeuj rungh, song duz ma couh raeuq bamz mbouj dingz, buet doh rungh lienz haexnyaen cungj mbouj nyangz. Liengz Yinghyungz ngoenz song ngoenz couh daiq doiqmagouh de lauh mbanj, gyuk bae ra ma doxhaeb. Baez dingqnyi sing raeuq magouh,mboujlwnh mou ma cungj buet dai deuz mingh, roet sinz nyouh rih. LiengzYinghyungz angq naeuz：“Hehe,daengx biengz suenq magouh guh vuengz lo！” Magouh laihnaeuz cihgeij dwg laj mbwn daih’it guengz, hoeng cix dogdogmbouj gamj nyex gukceij.
Miz ngoenz ndeu,Ojocaeuq gukceij cingq youq bien dah ciengx hanq. Liengz Yinghyungz gwed cicungqroeg ndeu caeuq doiq magouh de gyaep duz ma gyaeujndoq he buet gvaqdaeuj.Daj gyae yawjraen gukceij, magouh gipmuengz daengx roengz, youq gizhaenx cienqbae cienq dauq, lig heuj maenjngwngw, lwgda myonxyagyag. Gukceij ndwn youq henzndang Ojo, mbouj sing mbouj swt, diuz rieng gienj hwnjdaeuj lumj cih “9” nei. Liengz Yingjyungz buet daengz gyawjcouh hemq:”Hoha! Duzma haex Ojo! Gamj mbouj gamj doxhaeb?” Raen Ojo mboujleixlangh, Liengz Yinghyungz gip ndaek namh ndeu gveng gvaqdaeuj, magouh baenghcawj guh mbei, maenjhuhu couh yaek cung hwnjbae buekmingh. Dingjlingz daduicangjdaeuj guhsaeg yawjraen, guhmuengz gyaep doiq ma de deuz, lij ndaq LiengzYinghyungz: “Duz lwg baih gya neix! Gwn dungx raeng couh okdaeuj caux saeh! Mehmwngz……” Liengz Yinghyungz mbouj fug, itmienh byaij deuz itmienh ngeux gyaeujcouq: “Lwgsit lwgdej ej goengda yahdaiq!” Daduicangj huj le cung gvaqbae coemjdawz Liengz Yinghyungz, fak gvaz fak swix, fak dwk de daenghnaengh gwnz namhdaejnganga, itmienh daej itmienh ndaq cojcoeng. Ojo daeuj gyawj siengj beng dehwnq, mboujliuh fanj deng de ngaem gyaeuj daemj laemx dingjhai youq gwnz namh.Ojo hamz raemxda ndwn hwnjdaeuj, bongxbongx faenx gwnz ndang, caeuq gukceij laehhanq baema lo.
Gvaq mbouj geijnanz, miz ngoenz ndeu, Ojo caeuq dahnuengx cuengqhag ma daengz buenq loh,Liengz Yinghyungz daiq geij daeg hujgeiq, homh song beixnuengx youq cungqgyang.Liengz Yinghyungz ngengq gyaeuj bej de riumimi cam: “Vaqngauh, sou beixnuengxboux ga dinj boux ga raez, mbouj doxlumj ha! Dauqdaej bouxlawz dwg lwgndai?”
“Hohoho!….”
Song beixnuengx dacaengz gyoengqde, cungj mbouj guhsing. Gukceij buet gvaqdaeuj, youq gyaenx cienqndundu.Liengz Yinghyungz lexlex gukceij naeuz: “Duzma neix yienghsiengq ndeilau,gizsaed dwg ma haex! Vaqngauh Ojo, gamj mbouj gamj hawj de caeuq magouh hoenxciengz ndeu?”
Ojo laepda dwkmbouj guhsing.
“Ngoemx la? Moebmwngz rox mbouj rox hemq?”
Geij daeg hujgeiqvid gen vid ga. Ojo lij mbouj hai bak.
“Yawj mwngz mboujhai bak!” Liengz Yinghyungz doq ndaq doq mbuk roengz ndaw dangzvaq bae, mboujrox daj lawz ciemz geij dug bwn okdaeuj, oet haeuj bak Ojo bae. Ojo nyaenxmboujndaej lo, sab haeb gaemz ndeu. Liengz Yinghyungz swenj “Ya-” , baez yawjlwgfwngz gaenq ndik lwed swdswd. Geij daeg hujgeiq sikhaek humx gvaqdaeujsiengj banj laemx Ojo. Hoeng mbouj guenj baenzlawz roengzrengz, cungj banjmbouj laemx. Liengz yinghyungz swenj: “Gaem ga! Gaem ga!” Ojo ga dinj, baezdeng gaem ga mbat yaeuj couh laemx lo. Yifung gipmuengz swenj:“Gukceij! Gukceij!Haeb gyoengqde!” Cij dingqnyi gukceij rongx sing ndeu, geij daeg hujgeiq cacoemjbuet deuz. Liengz Yinghyungz ngamq buet geij yamq couh hoemj laemx gwnz namh.Gukceij buet nduengndueng bae daengz henz cix mbouj haeb de, cij maenjhuhu geijsing. Hoeng Liengz Yinghyungz gaenq deng hwk dwk roet sinz nyouh rih, youq gwnznamh ruenz gyomqgyomq, yinx ndaej Ojo caeuq Yifung riuhaha ….
----- Lij miz, deq swnj!

----- Swnj baihgwnz
(4)
Doeklaeng, Yifungbae doeg gauhcungh, youh caeuq Liengz Yinghyungz caemh ban. Ojo mbouj doeg sawlo, daxboh heuh de youq ranz dajcawj, son de gawq faex dajdoq, luih duk dajsan.
Daxboh heuh guh maz,Ojo couh ngaem gyaeuj bae guh, mbouj lai gangj saek coenz. Ndaejhoengq seiz, Ojociengz daiq gukceij bae dwknyaen. Mbwn ngamq fuemx, Ojo gamz doengz ien he okdou, couh miz geij daeg hauxseng gaenlaeng “gip faenh”. Gyanghwnz ndaej nyaendauqma, heuh daxboh hwnq, bouxboux nyaengqfoed, mbouj geij nanz, fan naengnyaen ndik lwed venj ok rog dou. Ndaw ding noh cix rangfwtfwt, laeuj homswtswt,gangjgangj riuriu nauhyied dangqmaz.
(5)
Doengzsaemh cungjaeu yah baenz gya lo, ga dinj Ojo ngoenz beij ngoenz mumh raez, vanzlij ramboujndaej youx. Cawz “sau geq” Dahcuij le, mbouj raen dah lawz doiq de riugvaq.
Dahcuij dwg caeuqOjo ranz caemh luengq, seng caemh bi, lijiq daxmeh couh gvaqseiq lo. De mboujsang mbouj daemq, naj mwn, bak mbwnj, aek raeng gumq biz, yienghsiengq cixmbouj loek, couh dwg miz di “mwnh”, baenzngoenz maij cup lwgfwngz. Miz ngoenz ndeuyahmoiz daiq de bae haw caeuq daegmbauq he doxcim, baez raen naj, Dahcuij couhbak hamz lwgfwngzmeh, riunyubnyub mbouj oksing. Codaeuz daegmbauq laihnaeuz dwglaunyaenq, doeklaeng yied cim yied ngeiz, couh cam: “ Mwngz vihmaz ……” Dahcuijbyod byiq gaemz naiz ndeu, han naeuz: “ Gvenq lo!” Gangj sat youh cup, lwgda dinghyawj daegmbauq, cup fwngz depdep yiengj. Daegmbauq ngeux gyaeuj couh deuz.Saehcingz cienz okbae le, mbouj raen daeg lawz caiq gamj daeuj cam Dahcuij lo.
Banhaemh, Dahcuijciengzciengz daeuj yawj Ojo dajsan, mizseiz lij bang de soek faex liuh duk,caeuq de gangjgangj riuriu.
Mwh lwgnyez, songvunz caez “daeb ranz guhyah”, Ojo naeuz: “ Cuij, raeuz hag guh gvanbaz.”Dahcuij yienznaeuz mwnh, vah dauq gangj miz dauhleix: “ Caemh mbanj caemhluengq, soqlaiz mbouj ndaej doxaeu.”
Coenz vah neix, Ojonanznanz mbouj lumz. Caemh mbanj caemh luengq, soqlaiz mbouj cinj doxaeu.
Ojo siengj: Aeumbouj aeu yah, miz gijmaz youqgaenj ne? Haeux gou rox daem, raemz gou roxraeng, hw, aeu yah daeuj git ga, aeu baz daeuj git hoz! Lumj gosam ranz laj, baenzngoenzcaeuq saujsam doxceng, geijlai simfanz! Hw, mbouj aeu ……
Hoeng haemhroengzninz le, Ojo couh doeng siengj sae ngeix, hix gig siengj lwgsau. Ojombouj caengz “rox” vunzbaz, hoeng doenghhaemh bae dwk nyaen, Doengzdoih lwnhgij gojsaeh goeng’yah haenx, Ojo dingq le cungj naj ndat sim diuq ……
(6)
Doenghngoenz bohmehbae doengh guh hong, Ojo youq ranz cawj ngaiz gueng mou, doq daiz doq daengq,san ndij san lomz gai aeu ngaenz soengq dahnuengx doeg gauhcungh. Dahcuijciengz daeuj bang fwngz, Ojo gag raen gvaqeiq mbouj bae, couh cawx mbaw gaengyaeuj va he soengq hawj de.
Miz ngoenz ndeu,gyoengq hanq Ojo ndonj haeuj ndaw suenbyaek Dahcuij bae, boh Dahcuij gighozgaek, fad dai song duz hanzlwg. Raen Ojo daeuj ra hanq, boh Dahcuij naj gawhbaenz heng, mbouj cam mbouj caz, sien roq Ojo seiq haj aen lwggyag, youh ndaqnaeuz: “ Gou sinsin hojhoj ndaem byaek, hawj duz hanq raq mwngz daeuj caeg gwn?Gou byaek lw byaek reuq mbouj gven mwngz saeh, geb viz mwngz deuz gyae di! …..”
Bonjlaiz mbouj mizmaz saeh, hoeng deng boh Dajcuij baez “ndaq” okdaeuj, couh boux cienz boux,goek noix byai lai, daengx mbanj vunz cungj ngeixlwnh “Ojo caeuq Dahcuij”baenzlawz baenzlawz …… Dahcuij youh deng daxboh fok geij baez, caiq hix mboujgamj daeuj caeuq Ojo gangj riu lo.
Gvaq seiq hajngoenz, Dahcuij caeuq boh de ram rin humx suenbyaek, cijraen Ojo loh genz umjndaek rin hung he, lau miz song bak gaen naek, gwnz ndang de noh haen hwnjbaenz limq baenz limq, itmienh byaij itmienh raix roet, yinx ndaej Dahcuijriugekgek najhoengz baenz gaeqhangh okgyaeq. “Riu auq!” Boh Dahcuij ndaqnaeuz,cienq bae cam Ojo: “Mwngz umj rin daeuj guh maz ha?” Ojo cuengq rinroengzdaeuj naeuz: “ Raen mwngz humx suen, daeuj bangbang, mienx ndaej hanqyouh haeujbae ……”
----- Lij miz, deq swnj!

----- Swnj baihgwnz
(7)
Siengj mboujdaengz, daxboh Ojo bae langh cwz, laemx youq byongh bya, yw bae cien lai maenzngaenz, vanzlij hwnq mbouj ndaej, mbouj geij nanz couh gvaqseiq lo.
Yifung gauhcunghcaengz bizyez, couh gag gienj doxgaiq dauq ranz, mbouj doeg saw lo. Cienz ranzsam mehlwg caezsim guhhong, ciengx mou ciengx gaeq; Ojo youh miz dinfwngz,dajdoq dajsan lauh ndaej cienz. Ndaw ranz ciemhciemh fouqmiz, mboujdanh boiz caiqliux, vanzlij cawx ndaej aen densigih ndeu.
Banhaemh, daengxmbanj bouxlaux lwgnyez cungj comz daeuj yawj densi, ranz caengz laep gyanghonghcouh caenx rim vunz lo. Yawj densi sat, mbangj bouxlaux lij naengh cit ien gwncaz, ngeixlwnh ndaw densi baenzlawz cang ndaej baenzlai vunz; mbangj hauxsengengq mbouj nyienh deuz, naengh bien mbonq Ojo caeuq Yifung gangj goj daeuq riu.
Yifung seizneixgaenq saundei ndaej sawj vunz simmaez, song ceh da de lumj rox gangjvah,seizbienh yawj mwngz baez ndeu, hawj mwngz gag sim diuq bengbeng. Caiq mboujyungh gangj gijmaz “hwet reux naj maeq, bak hoengz heuj hau” lo. Mbangjdaegmbauq mbanj wnq bak naeuz daeuj yawj densi, gizsaed ndaw sim dwg daeuj yawjvunz.
Sausau mbauqmbauq,ndaw ranz Ojo nauhyied dangq haw, hoeng cix dogdog mbouj raen Dahcuij.
Mbouj rox vihmaz,Ojo caen miz di siengj Dahcuij, ciengzciengz loq raen de gyaeb mbaw gaen gyaeujva ndeu, riunyumnyum buet daeuj coh. Hoeng, mizseiz song vunz youq gyang luengqroxnaeuz bangx dah doxnyangz, Ojo cungj mbouj gamj ngiengx gyaeuj.
(8)
Yifung saundeibaenz duj va’mauxdan nei, yinx ndaej mbaj luenh rwi maez. Yahmoiz boux haeujboux ok, Yifung cungj ngauz gyaeuj mbouj hai bak. Ojo baez raen yahmoiz haeujdou couh gag nyapnyuk. Miz boux yahmoiz ndeu saemxsaemx saxsax dongj doek aenmaegdaeuj gwnz daengq, youh mbouj bang gip hwnjdaeuj, doeklaeng deng Ojo ndaqok dou bae, lienz vah cungj caengz ndaej daez saek coenz.
Yifung dauqdaejbaenzlawz siengj ne? Cij miz de cihgeij cingcuj.
Miz vunz naeuz,Yifung dwg duz funghvuengz ndeu, siengj mbin gyae ne.
Miz vunz naeuz,Yifung caeux couh miz youx lo, dwg daeg doengzhag gauhcungh de, seizneix gaenqbae doeg dayoz lo.
(9)
Mbanjgwnz boux yahmoizndeu riuj haujlai doxgaiq yamq haeuj ranz Yifung. Ngoenz haenx Ojo bae bang bohnaxguh ranz mbouj youq, yahmoiz ok dou seiz bak riuvauvau, loh ok song diuzheujgim ndongqmyagmyag. “Heujgim” dwg daeuj caeuq daeg lawz guhmoiz ni? DwgLiengz Yinghyungz.!
Dwen daengzgyaeujbej Liengz Yinghyungz, geiq ndaej lijiq ceiq ak doxdaj, seizneix gwnz najde lij miz gaiq mbangq ndeu guh “geiqhauh” ne. Meuz sug loh nou, mou sug lohhaex, Liengz Yinghyungz couh dwg baengh geij faen manzgyaengj de, dang hwnj yanghganbu lo!
Siengj daengz haqhawj daeg ganbu ndeu, Yifung miz di simdoengh. De rox cihgeij baenzsau gvaqdoih, youh doeg gvaq gauhcungh, boiq ndaej hwnj Liengz Yinghyungz.
Gvaq geij ngoenz,Ojo dauq daengz ranz, rox gienh saeh neix le, gig mbouj haengjheiq, naeuzLiengz Yinghyungz “beizheiq laekgaek, sim mbouj cingq”, caiq gangj Yifung ngamqcib caet bi, caengz hab bae’haq. Seizneix daeggo youh caengz baenzgya, dahnuengxguhlawz sien ok ranz ne? Yifung dingq nyaenx gangj, hix mbouj gamj euq.
Ngoenzlaeng daxmehdawz laex bae boiz yahmoiz, doi naeuz Yifung nienz oiq, mbouj hab “gvaqhoengz”.
(10)
Ndaw gyok raen gagranz gag guenj cwz mbouj bienh, couh dawz cwz gyonj hwnjdaeuj, song ranz songranz doxlwnz ciengx, ranz duz ndeu ciengx sam ngoenz, song duz ciengx seiqngoenz, sam duz ciengx haj ngoenz. Daengx gyok caenh ranz Ojo caeuq ranzDahcuij miz sam duz cwz, song ranz neix cij ndaej gapdoih. Suenq daeuj 27ngoenz lwnz daengz baez, moix baez haj ngoenz. Baeznaengz dwg meh Ojo caeuq bohDahcuij bae ciengx, song laux gangjgoj nyenye laeh cwz haeuj rungh, cix mboujrox bouxlawz linx naeuh, luenh vab naeuz: “Bohmaiq caeuq mehmaiq, doxdaiq baeciengx cwz; rungh fwz rug cix fwz, gwqgwq ndaej gapdoih.” Youh deng gyoengqlwgnyez hag bae, dangguh damzraih heuh, loengh ndaej song laux naj hoengz rwzdit, ngoenz daihngeih ganjvaiq baij Yifung caeuq Dahcuij bae lawh. Yifungsiengj doi hawj daeggo, Ojo vadvad fwngz, danq gaemz heiq ndeu raezranghrangh.
----- Lij miz, deq swnj!

----- Swnj baihgwnz
(11)
Bi daihngeih, goenglohbu daengz rog mbanj, haujlai vunz cawx ndaej danci. Ojo ndwn gwnz bo, yawjgyoengq lwgsau lwgmbauq naengh danci baebae dauqdauq, gag ndwnj naiz gyoggyog,hozgyawh nod hwnj nod roengz. Yienznaeuz ndaw ranz gaenq cawx gyaq“funghvuengz’ ndeu, hoeng Ojo ga dinj, caij mbouj daengz. Daj cawx ndaej dancile, baez daengz ngoenzhaw, Yifung couh roi gyaeuj cang ndang, caeuxcaeux naenghdanci bae haw lo, mbwn yaek laep cij dauq daengz ranz.
Ojo roxnyinhdahnuengx bienq lo.
Miz vunz raenYifung ciengzciengz caeuq Liengz Yinghyungz guhdoih youz gai, doiq magouh haenxcungj gaen youq baihlaeng.
Mbouj geij nanz,Yifung haeuj ndaw yangh gunghyicangj bae dang hozdungzgungh lo, ndwen songndwen cij dauq ranz saek ngoenz.
Ndaw ranz hong nazhong reih, cungj dwg Ojo caeuq daxmeh bau liux lo. Ojo moix ndwen bae caeuq bohDahcuij ciengx haj ngoenz cwz, swnhbienh aeu fwnz. Boh Dahcuij ciemhciemh yawjok: Ojo saedsaed caihcaih sim soh youh naengzganq, dwg daegmbauq ndeigyaezndeu.
Miz haemh ndeu,ronghndwen ngamq hwnj, Ojo caeuq vunzlai naengh gyanghongh yawj densi, Dahcuijsawqmwh riuj aen daengqgeg ndeu naengh daengz henz ndang de, song ceh daronghliklik, yawj ok de simhai dangqmaz. Bi lai lo, song vunz lij dwg baezdaihit dep gaenh baenz neix. Ojo dingq ndaej nyi Dahcuij diemheiq, mup ndaejdaengz heiqhanh gwnz ndang de ……
Densi sat le,Dahcuij laeglemx doiq Ojo naeuz: “Haetcog boh gou hawj gou caeuq mwngz baeciengx cwz li!”
Haemhhaenx, Ojofonj bae foek dauq cungj ninz mbouj ndaek, doeklaeng cijndaej hwnqdaeuj cit iendeq ranzrongh.
Haetlaeng, Ojonaeuz gyaeujdot, heuh daxmeh bae ciengx cwz.
Bancaeuz, bohDahcuij dawz bingz laeuj he daeuj daengz ranz Ojo, Ojo cauj geij deb byaek,song vunz menh gwn menh gangjgoj.
“Ojo ha, bi’gvaq auukhonz, luenh ndaq luenh raeuq, caen mbouj baenz ……”
“Mbouj, gangjsaedvah, mwngz …… mwngz ndaq ndaej deng ……”
“Mbouj gangjbaenzlai ba, mwngz gaej dawz haeuj sim bae, ……”
Ojo boemz youq gwnzdaiz, sawqmwh daej ok sing daeuj.
(12)
Yifung caeuq LiengzYinghyungz caengz humx suen couh ndaem byaek lo, ranz Liengz hix gaenq soengqlaex daeuj. Ojo mbouj caiq oksing, soengq mingh ngoenz haenx, de naengh gyang dangqlienzlienz cit bae bet doengz ien.
Sam nyied seizcin,doenghnaz heuswdswd, gwnz bya va hai ndongqgywg, heiq rangfwtfwt. Ojo caeuqDahcuij laeh cwz haeuj rungh bae, cungj mbouj doxgangj saek coenz. Dahcuijdaenj aen gyaeprong he, bien gyaep naep miz caet bet duj va, hoengzhoengz henjhenjhaemq ndei yawj. Gukceij hix riengz daeuj lo, youq bien loh buet hwnj buetroengz, raen duz cwz lawz byaij liz doih, couh gvaqbae maenj geij sing.
Hat cwz hwnj byale, Ojo naengh bien rij, daj gyaeujvaq yut aen dig ndeu okdaeuj boq. Gukceijnaengh doiqnaj de, lumj laeq lwgnyez nei ngengq rwz dingq. Sing dig goksetsetunqnemnem rwenz doh rungh, lumj geu raemxmboq he liengzsisi lae gvaq ndaw simvunz. Dahcuij ndwn youq giz gyae, bak hamz lwgfwngz, byaengq lwgda yawj Ojo.
Mbwn gvengqleklek,daengngoenz ring ndaej vunz ndang raeujrubrub. Ojo ninz gwnz dieg nya daengjhaicit ien, raen gukceij yawj de da mbouj yaep, couh dawz doengz ien naep haeujndaw bak duzma bae, naeuz: “Cit vei, goeng!” Gukceij baez mup couh ngaem gyaeujae goepgoep. Dahcuij cienq ndang boenqbwq riu hwnjdaeuj, cig riu daengz raemxdarih bae. Ojo hix nyaenx mboujndaej riu lo. Gukceij laihnaeuz ok maz saeh,ngiengx gyaeuj daengj rwz raeuq ngobngob.
Gwn ringz gvaq le,Dahcuij cam Ojo aeu dig daeuj hag boq, boq bae boq dauq, boq dwk da va gyaeujngunh lij dwg bitlit betlet mbouj baenz sing. Ojo sou dig hwnjdaeuj, naeuz:“Gaemz dog gwn mboujndaej ceiz ndat, aeu menhmenh daeuj. Ngoenzcog caiq boq ba.”
“Ojo, gvaqlaengmwngz gaej cit ien lo.” Dahcuij sawqmwh naeuz.
“O, vihmaz?”
“Cit ien miz mazyungh? Aen dig mwngz caen haeu ien!”
“Haha! ……” Ojo nyaenxmboujndaej riu hwnjdaeuj, “Ngoenzcog gou hwnj bya bae ra gogoen, bang mwngz guhaen ndeu. Ien ma, cungj lij aeu cit bw!”
----- Lij miz, deq swnj!

----- Swnj baihgwnz
(13)
Mwhhaenx, Ojo caeuqDahcuij lumj song beixnuengx nei doxndei, saedceij gvaq ndaej gig simhai. Mizngoenz ndeu, Dahcuij cingq ngaem gyaeuj cup lwgfwngz, Ojo naeuz: “Cup fwngzmbouj veiswngh, hix yakyawj, gaij bae ba!” Dahcuij naj baez hoengz, guhmuengzyot fwngz okdaeuj, yo haeuj baihlaeng bae. Danhseih gvaq geij ngoenz le, Ojoyouh raen Dahcuij lij dwg “ma gaij mboujndaej gwn haex, sae gaij mboujndaej gwnnamh”, couh naihsim cam:
“Cuij ha, mwngzvihmaz cungj gyaez cup lwgfwngz ni?”
Dahcuij naemj yaepndeu, fanj cam:
“Mwngz ni, mwngzvihmaz cungj gyaez cit ien ha?”
Ojo bak ajngubngub,buenq ngoenz gangj mbouj ok vah. Ndaw sim naemj: Bouxlawz naeuz Dahcuij “mwnh”,bouxde cij caen dwg “mwnh” ne.
Gvaq mbouj geijnanz, vunz ndaw mbanj gag raen geizheih: Ojo mbouj cit ien lo, Dahcuij caemhmbouj cup lwgfwngz lo. Meh Ojo naeuz: Dahcuij bienq lo, yied bienq yied cinghseuq,yied bienq yied lingzleih lo.
(14)
Dahcuij ciengzciengzriengz Ojo hwnj bya bae aeu fwnz. Ojo din niu fwngz riengj, bin dat ak gvaqvunz, giz dat vunz mbouj gamj daengz, gaeng mbouj gamj raih haenx, de hwnjbaecouh lumj byaij diegbingz. Ojo fwngz ndeu va dat, fwngz ndeu yaengx cax raemjfwnz. Bin daengz dingj bya, Ojo naengh dwk yietnaiq, rumzliengz dawz gij fwende ci ndaej gig gyae gig gyae:
Ae-----
Labnyied mbwn nitnit,
Loegnyied nditndat yanz;
Ok rog cix sim fanz,
Youq ranz caemh nyapnyuk.
Go’mbu cix vahoengz,
Hai ndaw boengz daemz vaih;
Ga gvez mbouj ndei byaij,
Doeknaiq gvaq ciuhvunz.
……
Dahcuij youq lajdat dawz fwnz rom hwnjdaeuj, cug baenz seiq gwed, nda baenz song rap.
Mbwn gvangqlangh gvengqlaek,song duz yiuh cingq youq laj fwjheu cienqgvax, geijlai cwxcaih.
(15)
Seizhah daeujdaengz lo, ndit ngoenz beij ngoenz haenq. Gyoengq cwz baez hwnj bya, couh ndojhaeuj ndaw caz bae, ninz ndaw raemh nyaijbiengj.
Ojo daiq gukceijhaeuj ndaw gamj laj dinbya bae yietliengz, gukceij gaenq hwngq ndaej bak ajlinx conh, diemheiq hoho lo. Dahcuij naengh youq bakgamj yawj cek saw dozvehhe, byai ndaeng mauh ok geij diemj hanh.
Dahcuij nyouh conh,gvaq henz gamj bae gej saivaq, cingq yaek maeuq roengzdaeuj, sawqmwh yawj raenduz ngwzhaeuq hunghung he iet linx myabmyab nod coh bakgamj. “Ya-----Ojo!”Dahcuij doq swenj doq yiengq ndaw gamj buet bae, mboujliuh ngamq buet geij yamqcouh laemx lo.
Ojo dingqnyi singswenj, sikhaek buet okdaeuj, rag Dahcuij hwnq. Duzngwz gaenq daengz gyawj, gyaeujdaengj cik lai sang, hoz bej bak mben, boqfofo hawj vunz dwglau. Ojo dajbaihlaeng yut caxfwnz okdaeuj, gaex Dahcuij gvaq henz bae, cij raen gukceijgaenq maeuq daengz baihnaj, rig heuj loh faenz, gwnz bak myonx ok geij diuz riznyaeuq,caeuq duzngwz da doiq da doxcaengz. Duzngwz suk dauq song yamq, sawqmwh byiqgaemz naiz ndeu okdaeuj, sinz daengz henz ndang Ojo. Gukceij fwt cung hwnjbae, baezyaepda couh haeb dawz hoz duzngwz. Duzngwz yaengx rieng baez fat, dawz gukceij heuxbaenz geij hongx, gyoet ndaej ndaetndwngndwng. Danhseih gukceij haeb dai mboujcuengq, cig daengz duzngwz unqnemnem dai bae ……
Dahcuij hixunqnemnem boemz haeuj ndaw rumq Ojo……
----- Lij miz, deq swnj!

----- Swnj baihgwnz
(16)
Gouj nyied cocib,Yifung caeuq Liengz Yinghyungz gezvwnh, youq ranz cingj laeuj. Bancaeuz, Ojocingq nyaengq daih hek, miz vunz swenj: “Ojo, vaiq daeuj ha, gukceij caeuqmagouh doxhaeb lo!” Ojo buet daengz rog mbanj seiz, cij raen sam duz ma mwngzsaeg gou bag cingq hoenx ndaej faenx geuj namh sinz, nanz gej nanz mbek. DaxbohLiengz Yinghyungz song fwngz gaem diuz faexhanz he, yungh rengz bae gek, hoengdangq byiq myaiz ndaep feizndoeng----- fouz yungh. Yifung Liengz Yinghyungzcungj buet daeuj lo, daengx mbanj cungj gingdoengh lo.
Magouh duz gonq duzlaeng, bak haeb nyauj vax, yakdoeg raixcaix. Gukceij foux naj gvax laeng, yathwnj gvaengh roengz, mbouj suk mbouj yup. Mbouj geij nanz, sam duz ma cungjhaeb dwk lwed swgswg.
Liengz Yinghyungznaj bienq naj ndaem, sawqmwh daj ndaw fwngz daxboh dued aeu faexhanz, buekminghgek gukceij okdaeuj. Gukceij youh yaek goq doxhaeb, youh yaek veq faexhanz, renaj nanz re laeng, deng magouh coemj gvaq laj, doq gaenx doq haeb. “Vaiq gekha!”Yifung swenjyauyau, hoeng Liengz Yinghyungz gaenq ndwn gyaenx fatmoengx lo.Ojo buet daengz dangqnaj gukceij swenj: “Boek! Boek! Gukceij!” Cij raen gukceijbaez boek ndang, rongx sing he diuq hwnjdaeuj, coemj laemx duz magouh ndeu, sabhaeb dawz hozgyawh de, lingh duz magouh cingq yaek sauz caeghaex gukceij, mboujngeix gukceij fanj coemj dauqlaeng, haeb dawz hozlaem de…..
Caen camj ha, songduz magouh rwz sik hoz mbongq, iet youq laj namh cak yaep he, couh boemz riengmbouj doengh lo.
Gukceij buet daeujdaengz henz dah, yat diuq roengzbae, youq giz raemxfeuh vaijcoco, lwed daj gwnzndang ndik roengzdaeuj, nyumx hoengz raemx bien dah ……
------ Daj SAM NYIED SAM genj aeu daeuj（2007/03/15）
----- Swnj sat!

dwg gou sij daeuj mij？

raez lai